ا پنی نئی دلہن کے ساتھ وقت گزارنے میں بھتیجی کو رکاوٹ سمجھتے ہوئے ایک چچا نے اپنی بھتیجی کا قتل کردیا

حیدرآباد 26نومبر(یو این آئی ) اپنی نئی دلہن کے ساتھ وقت گزارنے میں اپنی بھتیجی کو رکاوٹ سمجھتے ہوئے ایک چچا نے اپنی بھتیجی کا قتل کردیا اور لاش کو پٹرول ڈال کر جلادیا ۔
یہ واقعہ آندھراپردیش کے ضلع پرکاشم میں پیش آیا ۔ ذرائع کے مطابق دو سالہ آرادھیا نامی کمسن لڑکی اپنے مکان کی بالکنی میں کھیل رہی تھی کہ وہ کل صبح لاپتہ ہوگئی ۔ اس کے ماں باپ نے اس کو تلاش کیا لیکن اس کا کوئی پتہ نہیں چلا جس کے بعد پولیس میں شکایت درج کروائی گئی ۔ پولیس نے



اس واقعہ کی تحقیقات کے دوران لڑکی کے چچا کے لکشمی نارائنا سے پوچھ گچھ کی جس پر اس نے اعتراف کیا کہ اس نے اپنی بھتیجی کا گلا گھونٹ کر قتل کردیا اور بعد ازاں اس نے پٹرول چھڑک کر اس کی لاش کو آگ لگادی ۔ اس نے پولیس سے کہا کہ وہ اپنی بیوی سے محبت کرتا ہے لیکن وہ اس لڑکی کے سبب اپنی نئی نویلی دلہن کے ساتھ وقت گزار نہیں پارہا تھا جس کے سبب اس نے اپنی بھتیجی کا قتل کردیا اور لاش کو جلادیا ۔ دلچسپ بات یہ ہے کہ لڑکی کی تلاش میں اس نے اس کے والدین کے ساتھ بھی حصہ لیا ۔